Pro iscrìere in sardu in Android tenimus teclados adatos e frunidos de curretore ortogràficu (a es. AnySoftKeyboard) chi nos permitint in manera fàtzile de impreare sa limba sarda e totu sos caràteres suos, e custu est fàtzile a lu fàghere fintzas in sos elaboradores de iscrivania e in sos portàtiles chi impreant Linux.
Pro chie impreat Windows, in càmbiu, est prus difìtzile a iscrìere caràteres che a ÀÈÌÒÙ o su puntu mesanu “·”, chi s’impreat in s’iscritura a norma (a es. in “nara·li”, o “pompiende·lu”).
Pro risòlvere custu problema podimus installare una dispositzione de tecladu personalizada, impreende “Microsoft Keyboard Layout Creator“. Pro chie bolet inoghe b’est unu tecladu giai prontu, chi pro l’installare tocat petzi a estràere s’archìviu .zip, a incarcare in “setup.exe” e, a pustis chi s’installatzione noa at a èssere acabada, a torrare a allùghere s’elaboradore. A pustis sa dispositzione noa s’at a impostare in automàticu, sas teclas ÀÈÌÒÙ s’ant a pòdere iscrìere incarchende àèìòù cun su Blocu Majùsculu allutu e pro su puntu mesanu at a bastare a incarcare AltGr paris a su puntu normale.
TECLADU SARDU GIAI PRONTU (INCARCA PRO ABÈRRERE SA PÀGINA PRO L’ISCARRIGARE)
Pro chie imbetzes si lu bolet fàghere a sa sola, tocat a iscarrigare Microsoft Keyboard Layout Creator dae su situ suo, a l’installare e a pustis a l’abèrrere.
Su programma est petzi in inglesu, ma giai est fàtzile de impreare su matessi. Dae su menù “File” si podet importare unu tecladu chi esistit giai (a es. s’italianu) cun s’optzione “Load Existing Keyboard” e a pustis bastat a incarcare in una tecla pro bi insertare su caràtere chi bolides. A manca bi sunt sas optziones pro impostare fintzas sas teclas pro su Blocu Majùsculu, AltGr, Crtl e su Majùsculu normale.
Pro mudare sas impostatziones de su tecladu tocat de andare in “Project”->”Properties…” e, pro l’esportare, tocat a incarcare in “Project”->”Build DDL and Setup Package”, cosa chi at a creare una cartella cun sos archìvios de esecutare pro l’installare in unu dispositivu. A pustis bos at a bastare a incarcare in “setup.exe” in cussa cartella pro l’installare!
Aplicatziones in sardu 