Totu cantos connoschimus su navigadore lìberu Mozilla Firefox, a disponimentu pro totu sos dispositivos e sos sistemas operativos. Ma, paris a sa versione “istàbile” prus connota, b’est fintzas una versione “pre-alfa” pro elaboradores chi serbit mescamente pro fàghere sas proas de totu sas funtzionalidades e sas megiorias noas de su programma, e chi como gràtzias a s’iscuadra de Sardware est a disponimentu fintzas in sardu: Firefox Nightly
Sende unu progetu mannu, e duncas prus sensìbile de àteros a errores de tradutzione o cosas gasi, b’at galu bisòngiu de gente chi la proet e chi lis sinnalet faddinas de custa genia o lis potzat donare cussìgios (ma andat bene fintzas petzi a pedire acrarimentos).
Pro lu fàghere impreade sa tzarrada de su canale Telegram de Sardware o fintzas sas retzes sotziales issoro!
Canale de Telegram de Sardware:
http://www.telegram.me/sardware
Contu de Mastodon:
https://mastodon.social/@sardware
Situ ìnternet:
http://sardware.org/
Pàgina FB:
https://www.facebook.com/sardware/
Twitter:
http://www.twitter.com/sardware
Podet èssere una manera bella de agiudare su progetu, e in prus su de installare e impreare Firefox Nightly at a permìtere chi su sardu intret fintzas in sa versione istàbile, ca Mozilla l’at a autorizare petzi si b’at a èssere unu nùmeru de bastante de persones interessadas (chi bident pompiende su nùmeru de utentes chi impreant Nightly in sardu). Installade·lu e cussigiade·lu a sos amigos bostros, e ais a pòdere impreare totu sas funtziones noas de Firefox in antis de totu sos àteros e in limba sarda!
Pro installare Firefox Nightly in s’elaboradore bostru, sighide custa ghia:
1) Aberide custu ligàmene:
https://www.mozilla.org/en-US/firefox/all/…
2) Dae su primu menù a cortina, seletzionade Firefox Nightly; dae su segundu su sistema operativu bostru e dae su de tres chircade “Sardinian – Sardu” e seletzionade fintzas cussu;
3) Incarcade “Download Now” pro l’iscarrigare, e a pustis installade·lu incarchende in su documentu iscarrigadu! S’aplicatzione s’at a atualizare a sa sola e ais semper a tènnere sas funtzionalidades prus noas de Firefox!
Aplicatziones in sardu 